Сангриа е ароматично пунч вино базирано на овошје типично за Шпанија, Португалија и Аргентина.
Тоа обично се состои од црвено вино, сецкано овошје, шеќер, мала количина алкохол и сода вода. Сецканото овошје вклучува: портокал, лимон, лимета, јаболко, праска, диња, ананас, грејпфрут, киви или манго.
Сангриата го добила името по шпанскиот збор „sangre“ што во превод значи крв, поради својата типична темно црвена боја.
Сангриата се служи во цела Шпанија и Португалија во текот на летото. Често се служи со дрвена лажица. Во некои земји може да се купи и флаширана сангриа.
Овој оригинален рецепт се подготвува за 6 чаши.
Потребно е:
- 1/2 чаша бренди
- 1/4 чаша сок од лимон
- 1/3 чаша сок од портокал
- 1 шише (750 мл) суво црвено вино (Каберне совињон, Мерлот…)
- 1 јаболко, сецкано на коцки
- 1 лимон, сецкан на тркалца
- 1 портокал, сецкан на тркалца
- 1 лимета, сецкана на тркалца
- 2 лажици кафеав шеќер
- 400 мл газирана минерална вода
Подготовка:
– Во еден подлабок стаклен сад ставете го сецканото овошје. Одозгора посипете го со шеќерот и измешајте убаво. Оставете да отстои 1 час.
– Потоа во садот додадете го виното, брендито и сокот од лимон и портокал.
– Непосредно пред да ја послужите сангријата, во садот додадете ја и минералната вода. Можете да ставите и неколку коцки лед ако претходно не сте го изладиле виното.
